జె.వి.వి.కృష్ణా జిల్లా సైన్స్ టాలెంట్ టెస్ట్ గాంధీ మునిసిపల్ హైస్కూల్‌లో 21,ఫిబ్రవరి,2012 నాడు జరిగింది. ఈ టెస్ట్‌కు మండల స్థాయిలో పెట్టిన టెస్ట్‌లో అర్హత సాధించిన 75 మంది విద్యార్ధులు హాజరయ్యారు. సమావేశానికి పాఠశాల ప్రధానోపాధ్యాయులు శ్రీ వెంకటేశ్వర రావు అధ్యక్షత వహించారు. సైన్స్ టాలెంట్ టెస్ట్ ఉద్దేశం గురించి జె.వి.వి. రాష్ట్ర కార్యదర్శి జంపా కృష్ణకిషోర్ వివరించారు. ముఖ్య అతిధిగా జిల్లా ఉప విద్యాధికారి శ్రీ కె.దుర్గాప్రసాదుగారు హాజరై విద్యార్ధులలో శాస్త్రీయ దృక్పధం పెంపొందించటానికి జె.వి.వి. చేస్తున్న కృషిని కొనియాడారు. ఇది విద్యార్ధులలోని సామర్ధ్యాన్ని వెలికితీసి, మరింత ఎదుగుదలకు దోహదం చేస్తుందని చెప్పారు. సైన్స్ టాలెంట్ టెస్ట్ కోఆర్డినేటర్ శ్రీ వి.టి.ఆర్.నెహ్రూ టెస్ట్ రాయటంలో పాటించవలసిన నిబంధనలను,సూచనలను తెలియజేశారు. శ్రీ దుర్గాప్రసాదుగారు పరీక్షా పత్రాన్ని విడుదల చేశారు. జె.వి.వి.జిల్లా ఉపాధ్యక్షుడు వెంకట నారాయణ,జిల్లా ప్రధాన కార్యదర్శి పాగొలు రమేష్,జిల్లా కార్యదర్శి రాఘవరాజు, నగర ప్రధాన కార్యదర్శి కోయ వెంకటేశ్వర్లు, నగర కార్యదర్శి మరియు కంకిపాడు మండల సైన్స్ టెస్ట్ కోఆర్డినేటర్ ఆళ్ళ శ్రీనివాస రావు గార్లు వేదికనలంకరించారు. టెస్ట్ పూర్తయ్యాక 'కీ' విడుదల చేశారు. ఫలితాలు వెంటనే ప్రకటించారు. ఇంగ్లీషు,తెలుగు మీడియంల నుండి మొత్తం ఆరుగురు రాష్ట్ర స్థాయి టెస్ట్‌కు అర్హత సంపాదించారు. వీరు 29వ తేదీన గుంటూరు జిల్లా చిలుమూరులోని శ్రీ రామా రూరల్ విద్యాసంస్థలో జరిగే రాష్ట్ర స్థాయి టెస్ట్‌లో పాల్గొంటారు. 28న విద్యార్ధులకు విహార యాత్ర నిర్వహిస్తారు. ఫిబ్రవరి,29నాడు జరిగే ముగింపు సభలో గౌరవనీయ మాజీ రాష్ట్రపతి శ్రీ అబ్దుల్ కలాం గారు, కేంద్ర మంత్రి శ్రీమతి దగ్గుపాటి పురంధరేశ్వరి, రాష్ట్ర మంత్రులు శ్రీ కొలుసు పార్ధసారధి,శ్రీ డొక్కా మాణిక్య వరప్రసాదు, డా.శైలజానాద్‌గార్లు పాల్గొంటారు.
No comments:
Post a Comment